कार्यदल गठन : शिक्षक सरुवाको हल्ला फेरि चल्न थाल्यो
राष्ट्रियसभामा युवा माओवादीलाई लैजान लबिङ्
Source : Drishti News
काठमाडौं । माघ ११ गते राष्ट्रियसभा सदस्य निर्वाचन हुँदै छ । यसअघिका सदस्यहरूको समय सकिएपछि नयाँ सदस्यका लागि निर्वाचन हुन लागेको हो ।
यसअघि निर्वाचित २१ र मनोनीत १ जनाको समय सकिँदै छ । त्यसैले माघ ११ मा २० जना सदस्यका लागि निर्वाचन हुँदै छ । बाँकी १ सदस्य राष्ट्रपतिबाट मनोनीत हुने छन् ।
राष्ट्रियसभा सदस्यको निर्वाचन हुने भएपछि राजनीतिक दलहरू उम्मेदवार चयनका क्रममा छन् । यस कार्यमा नेपाली कांग्रेस अग्रस्थानमा छ । प्रदेशहरूबाट उम्मेदवारको सिफारिस माग्दै गठबन्धन दलबिच निर्वाचनमा गठबन्धन गर्ने निर्णय गरिसकेको छ ।
कांग्रेसले प्रक्रिया अघि बढाइसके पनि गठबन्धनका अन्य दल र प्रमुख प्रतिपक्षी दल नेकपा एमालेले भने यस विषयमा ठोस निर्णय गरिसकेको छैन । तर, सबै दलले आन्तरिक तयारी भने थालेका छन् ।
राष्ट्रियसभा सदस्य निर्वाचनको तयारी बढेसँगै नेकपा माओवादी केन्द्रमा भने युवालाई अवसर दिइनुपर्ने माग बढेको छ । त्यसमा पनि युवा–विद्यार्थीको नाम अग्रपङ्क्तिमा छ ।
सामाजिक सञ्जालमा माओवादी निकट युवा–विद्यार्थीले युवा नेतृत्वको नाम अघि सारेका छन् । अधिकांश विद्यार्थीले पूर्व विद्यार्थी नेता लेखनाथ न्यौपानेलाई पार्टीले अवसर दिएर न्याय गर्नुपर्ने माघ अघि सारेका छन् । उनीहरूले सामाजिक सञ्जालमा अभियान नै चलाएका छन् । उनी माओवादीमा अवसर नपाएका नेता हुन् ।
माओवादीका युवा–विद्यार्थीले लेखनाथसँगै वाइसीएलका पूर्व अध्यक्ष रामप्रसाद सापकोटा ‘दीपशिखा’, वाइसीएलका वर्तमान अध्यक्ष सुबोध शेर्पाली तथा अखिल क्रान्तिकारीका पूर्व अध्यक्ष रञ्जित तामाङ र वर्तमान अध्यक्ष पञ्चा सिंहलाई राष्ट्रियसभा सदस्य निर्वाचनमा उम्मेदवार बनाउनुपर्ने माग गरेका छन् ।
केही समय अघि माओवादीका महासचिव देव गुरुङलाई राष्ट्रियसभा सदस्य निर्वाचनमा उम्मेदवार बनाउने विषय चर्चामा आएको थियो । प्रतिनिधिसभा सदस्य निर्वाचनमा पराजित महासचिव गुरुङले भने यसको खण्डन गरेका छन् । आफू यस दौडमा नरहेको उनले भनेका छन् ।
युवा–विद्यार्थीले विभिन्न कोणबाट दबाब दिए पनि माओवादीले अहिलेसम्म कसलाई उम्मेदवार बनाउने भन्ने निर्णय गरिसकेको छैन ।
Comments