जेठ ३० भित्र कार्यसम्पादन मूल्यांकन फाराम बुझाउन देशभरका शिक्षकहरुलाई अनुरोध

 

काठमाडौं । शिक्षक सेवा आयोगले सामुदायिक विद्यालयमा कार्यरत शिक्षकहरूलाई कार्यसम्पादन मूल्यांकन फाराम भर्न अनुरोध गरेको छ । आयोगले बिहीबार सूचना जारी गर्दै आगामी जेठ ३० गतेभित्र कार्यसम्पादन मूल्यांकन फाराम भर्न र दर्ता गराउन सबै शिक्षा विकास निर्देशनालयहरू, शिक्षा विकास तथा समन्वय इकाइहरू र स्थानीय तहहरूलाई अनुरोध गरेको हो ।

२०७८ चैत मसान्तभित्रै बुझाउनुपर्ने कार्यसम्पादन मूल्यांकन फाराम कोरोना महामारीका कारण विद्यालय बन्द रहेकाले फाराम भर्न, दर्ता गर्न नसकिएको र वैशाख महिनाभर परीक्षा, नयाँ भर्नालगायत कार्यहरू रहेकोले सबै शिक्षकहरूलाई जेठ मसान्तभित्र मूल्यांकन फाराम बुझाउने समय तोकिएको छ ।

शिक्षक सेवा आयोग (११ औं संशोधन) नियमावली २०७८ बमोजिम हुनेगरी कार्यसम्पादन मूल्यांकन फाराम भर्न आयोगले आग्रह गरेको छ ।